වෙනිසියුලාව එරට ජනාධිපතිවරණ ප්‍රතිඵල අපේක්ෂාවෙන්

වෙනිසියුලාව එරට ජනාධිපතිවරණ ප්‍රතිඵල අපේක්ෂාවෙන් සිටිනවා.

වෙනිසියුලාවේ ජනාධිපතිවරණ ඡන්ද විමසීම මේ වනවිට අවසන්ව ඇති අතර එහි ඡන්ද ගණනය කිරීම ආරම්භ වීමට නියමිතව තිබෙනවා.

ජනාධිපතිවරණයෙන් පාලක සමාජවාදී පක්ෂයේ නායක වත්මන් ජනාධිපති නිකොලස් මධුරෝ තුන්වන වරටත් බලයට පත් වීමට ඉඩ ඇතැයි ඇතැම් වාර්තා සඳහන් කරනවා.

එරට වේලාවෙන් සවස 6ට ඡන්ද මධ්‍යස්ථාන වසා දැමීමට නියමිතව තිබූන ද ජනතාව ඡන්දය ප්‍රකාශ කිරීමට පෝලිම්වල සිටින්නේ නම් ඒවා විවෘතව තිබිය යුතු වුණා.

මදුරෝගේ ප්‍රධාන අභියෝගය ලෙස සැලකෙන්නේ විරුද්ධ පක්ෂ සන්ධානයක සහාය ඇති හිටපු රාජ්‍ය තාන්ත්‍රිකයෙකු වන එඩ්මුන්ඩෝ ගොන්සාලෙස් ය.

පාලක පක්ෂය ඡන්ද සොරකම් කිරීමට උත්සාහ කරනු ඇතැයි පැතිරුනු භීතියත් සමග ගණන් කිරීමේ කටයුතු විපක්ෂය ඡන්ද මධ්‍යස්ථානවල සෝදිසියෙන් සිටින ලෙස ඔවුන්ගේ ආධාරකරුවන්ගෙන් ඉල්ලා සිටියා.

පසුගිය වසර 25 පුරා වෙනිසියුලාවේ බලයේ සිටි පාලක පක්ෂය හිටපු ජනාධිපති හියුගෝ චාවේස් යටතේත් පසුව ඔහුගේ අනුප්‍රාප්තිකයා වන මදුරෝගේත් පාලනයට නතු වුණා.

2013 දී ජනාධිපති ධුරයට පත් වූ දා සිට, මදුරෝ පාලනය වෙනිසියුලාව ආර්ථික කඩාවැටීමකට ලක්කර ඇති අතර, එම කාලය තුළ දළ දේශීය නිෂ්පාදිතය 70% කින් හැකිලී ගියා. මිලියන 7.7 කට වැඩි පිරිසක් රට හැර ගිය බවද සඳහන්.