2024 ජනාධිපතිවරණයේ පළමු අදියරේ ඡන්දය ප්‍රකාශ කිරීම ආරම්භ වන අතර රාජ්‍ය අංශයේ සේවකයින් ලක්ෂ 7කට අධික පිරිසක් මේ සතියේ තැපැල් ඡන්ද ප්‍රකාශ කිරීමට නියමිත වෙනවා.
තැපැල් ඡන්ද සලකුණු කිරීම 2024 සැප්තැම්බර් 4 සිට සැප්තැම්බර් 6 දක්වා සිදු කරන බවයි, මැතිවරණ කොමිෂන් සභාව නිවේදනය කරන්නේ.
මෙවර මැතිවරණයේදී තැපැල් ඡන්දය ප්‍රකාශ කිරීම සඳහා පුද්ගලයින් 712,321 දෙනෙකු සුදුසුකම් ලබා තිබෙනවා.
මැතිවරණ කොමිෂන් සභාවට අනුව, 2024 සැප්තැම්බර් 04 වන දින දිස්ත්‍රික් ලේකම් කාර්යාලවල සහ මැතිවරණ කොමිෂන් සභා කාර්යාලවලදී ඡන්දදායකයින්ට තම තැපැල් ඡන්දය සලකුණු කළ හැකි වෙනවා.
සැප්තැම්බර් 04-06 දින දක්වා ජ්‍යෙෂ්ඨ නියෝජ්‍ය සහ නියෝජ්‍ය පොලිස්පති කාර්යාල, පොලිස් අධිකාරී සහ සහකාර පොලිස් අධිකාරී කාර්යාල, පොලිස් ස්ථාන, විශේෂ කාර්ය බළකා කඳවුරු, විශේෂ පොලිස් ඒකක සහ ප්‍රභූ ආරක්ෂක කොට්ඨාශවල නිල ඇඳුමින් සහ සිවිල් කාර්ය මණ්ඩලයට තැපැල් ඡන්ද සලකුණු කළ හැකියි.
සැප්තැම්බර් 05 සහ 06 යන දිනවල ත්‍රිවිධ හමුදා කඳවුරුවල සහ අනෙකුත් සියලුම රාජ්‍ය ආයතනවලද තැපැල් ඡන්ද සලකුණු කළ හැකි වෙනවා.
නියමිත දිනට තැපැල් ඡන්ද සලකුණු කිරීමට නොහැකි වන ඡන්ද දායකයින්ට සැප්තැම්බර් 11 සහ 12 යන දිනවල තම සේවා බලප්‍රදේශයේ දිස්ත්‍රික් මැතිවරණ කොමිෂන් සභා කාර්යාලයේදී ඡන්දය සලකුණු කිරීමට අවසර ලැබෙන බව සඳහන්.
ඡන්දය ප්‍රකාශ කිරීම සඳහා ජාතික හැඳුනුම්පත (NIC), වලංගු රියදුරු බලපත්‍රය, වලංගු විදේශ ගමන් බලපත්‍රය හෝ මැතිවරණ කොමිෂන් සභාව විසින් නිකුත් කරන ලද තාවකාලික ජාතික හැඳුනුම්පත රැගෙන යන ලෙසයි බලධාරීන් ප්‍රකාශ කරන්නේ.