වාලච්චේන කඩදාසි නැවත වැඩ ඇරඹේ!

වාලච්චේන කඩදාසි කම්හලේ මෙහෙයුම් නැවත ආරම්භ කර ඇති බව කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති පවසනවා.

සමාජ මාධ්‍ය ඔස්සේ ප්‍රකාශයක් නිකුත් කරමින් අමාත්‍යවරයා පැවසුවේ කඩදාසි කම්හලේ අක්‍රිය යන්ත්‍ර අලුත්වැඩියා කිරීමෙන් පසු මෙහෙයුම් නැවත ආරම්භ කළ බවයි.

පසුගිය වසරේ පෙබරවාරි මාසයේදී, ජාතික ආර්ථික හා භෞතික සැලසුම් පිළිබඳ පාර්ලිමේන්තු ආංශික අධීක්ෂණ කමිටුව, වාලච්චේන කඩදාසි කම්හල වසා දැමීමේ යෝජනාව වෙනුවට රාජ්‍ය-පෞද්ගලික හවුල් ව්‍යාපාරයක් ලෙස පවත්වාගෙන යාමේ හැකියාව සොයා බැලූ බව සඳහන් වුණා.

වාලච්චේන කර්මාන්ත ශාලාවේ යන්ත්‍ර 1956 දී ආනයනය කරන ලද ඒවා බැවින්, අලුත්වැඩියාව සඳහා ඇමරිකානු ඩොලර් මිලියන 1.2 ක් පමණ අවශ්‍ය බව වාර්තා වුණා.

ඇමරිකානු ඩොලර් මිලියන 1.2 ක් වියදම් කර යන්ත්‍ර අලුත්වැඩියා කළහොත්, දිනකට කඩදාසි ටොන් 5 ක් නිෂ්පාදනය කිරීමෙන් මසකට රුපියල් මිලියන 22 ක ලාභයක් ලබා ගත හැකි බව අනාවරණය වෙනවා.