හසලක තුෂාරට අතුරු තහනම් නියෝගයක්

TV දෙරණ අයත් පවර් හවුස් පුද්ගලික සමාගම හසලක තුෂාරට එරෙහිව ගොනු කළ නඩුව ඊයේ (10) කැඳවන ලද අවස්ථාවේදී නඩුව අවසන් වන තෙක් හසලක තුෂාරට එරෙහිව අතුරු ඉන්ජන්ෂන් තහනම් ආඥාවක් කොළඹ දිසා අධිකරණ විනිසුරු සඳුන් විතාන මහතා විසින් පනවනු ලැබුවා.

පැමිණිලිකරුට සහ පැමිණිලිකරුගේ කාර්යය මණ්ඩලයට කවරාකාරයකින් හෝ අපහාසයක් සිදු කිරීමෙන් විත්තිකරු ඇතුළු ඔහුගේ සේවක නියෝජිතාදීන් ද ඔහු මගින් සහ ඔහු යටතේ කටයුතු කරනු ලබන සියලු දෙනා ද වළක්වාලනු ලබන ලෙසට නියෝගය නිකුත් කර තිබුණා.

YouTube අවකාශයේ පවත්වාගෙන යනු ලබන SLVlog Pod Talks නමැති වැඩසටහනේ හසලක තුෂාර සංජීවට එරෙහිව රුපියල් මිලියන 500ක වන්දියක් ඉල්ලා අද දෙරණ අයත් පවර් හවුස් පුද්ගලික සමාගම විසින් මෙම නඩුව ගොනුකර තිබෙනවා.

ආගමික අපහාසයක් සිදු කිරීම යන චෝදනාව යටතේ අත්අඩංගුවට ගත් නතාෂා එදිරිසූරිය හට ඇප ලබාදීමට අදාළ පුවත අද දෙරණ 6.55 ප්‍රධාන ප්‍රවෘත්ති ප්‍රකාශයෙන් වාර්තා කළ ආකාරය SLVlog Pod Talks නමැති වැඩසටහනේදී හසලක තුෂාර සංජීව දෙරණ නාලිකාව විවේචනය කර තිබෙනවා.

ඒ අනුව දෙරණ නාලිකාව පෙන්වා දෙන්නේ අදාළ වැඩසටහනේදී දෙරණ නාලිකාව යනු ජඩ, කැත, ජරා, කුජීත, පජාත, අපත, චාටර්, ලැජ්ජා නැති චොර මාධ්‍ය නාලිකාවක් වශයෙන් හසලක තුෂාර විසින් විවේචනය කර ඇති බවයි.