කම්කරු අමාත්‍යංශයේ දැවැන්ත විද්‍යුත් වාහන මගඩියක්

කම්කරු හා විදේශ රැකියා අමාත්‍යාංශය විසින් විදේශයන්හි සේවය කරන ශ්‍රී ලාංකිකයන් සඳහා 2022-23 කාලයේ ක්‍රියාත්මක කළ මුදල් ප්‍රේෂණ පදනම් කරගත් විද්‍යුත් වාහන බලපත්‍ර ලබා දීමේ ආන්දෝලනාත්මක යෝජනා ක්‍රමය යටතේ නියමිත කාලය තුළ විදේශගතව සිටි බවට තහවුරු කර නොමැති පුද්ගලයන් 4 දෙනෙකුට සහ ඉතා කෙටි කාලයකට පමණක් විදේශගතව සිටි තවත් 419 දෙනෙකුට එම පහසුකම ලබා දී ඇති බව ජාතික විගණන කාර්යාලය විශේෂ වාර්තාවකින් හෙළිදරව් කර තිබෙනවා.

මෙම වාර්තාව පාර්ලිමේන්තුවට ඉදිරිපත් කර තිබුණ ද එය සභාගත කිරීමට පෙර පාර්ලිමේන්තුව විසුරුවා හැරියා.

එම වාර්තාවේ අන්තර්ගතය ගැන තොරතුරු දන්නා ආරංචි මාර්ගවලින් වාර්තා වුණේ ක්‍රම සහ විධි පිළිබඳ කමිටුවේ සඳහනක් මත ජාතික විගණන කාර්යාලය විසින් කරන ලද විමර්ශනය මගින් විද්‍යුත් වාහන බලපත්‍ර ක්‍රමය අපයෝජනයට ලක් වූ ආකාරය පිළිබඳ අනාවරණය කර ඇති බවයි.

අදාළ කාල සීමාව තුළ ගිණුම් බලපත්‍ර තබාගෙන සිටින සංක්‍රමණික සේවකයන් ඇතුළු ප්‍රතික්ෂේප කරන ලද බලපත්‍ර ඇතුළුව නිකුත් කර ඇති බලපත්‍ර 1,077ට අදාළ බැංකු ගිණුම් සඳහා විදේශ මුදල් එවීමේදී යම් මුදල් විශුද්ධිකරණයක් හෝ වෙනත් අක්‍රමිකතාවක් සිදුවී ඇත්දැයි මහ බැංකුවේ මූල්‍ය බුද්ධි ඒකකය විසින් පරීක්ෂා කළ යුතු බව ජාතික විගණන කාර්යාලය නිර්දේශ කර ඇති බව වාර්තා වෙනවා.

සංක්‍රමණික සේවකයන් වෙනුවෙන් මෙම වාහන ආනයනය කළ හෝ ඒවා ආනයනය කිරීමට පහසුකම් සලසා දුන් සමාගම්වල ආදායම දේශීය ආදායම් පනත අනුව නිවැරදිව හෙළිදරව් කර තිබේද යන්න සහ ඒ යටතේ නිවැරදි බදු මුදල ගෙවා තිබේද යන්න දේශීය ආදායම් කොමසාරිස් ජනරාල්වරයා හරහා පරීක්ෂා කරන ලෙස ද ජාතික විගණන කාර්යාලය රජයෙන් ඉල්ලා තිබෙනවා.

බලපත්‍රලාභීන් පසුව තම වාහන වෙනත් අය වෙත මාරු කර ඇති බව විගණකවරුන් නිරීක්ෂණය කළ නිසා මෙය අතිශයින් වැදගත් වන බව පෙනී යනවා.

එබැවින් මෙම ගනුදෙනුවලට අදාළ ඉපැයීම් අදාළ පුද්ගලයන් විසින් බදු වාර්තාවලට ඇතුළත් කර තිබුණේ ද යන ප්‍රශ්නය මතු වන බව ජාතික විගණන කාර්යාලයේ වාර්තාව ඔස්සේ වැඩි දුරටත් වාර්තා වෙනවා.

මෙම යෝජනා ක්‍රමය යටතේ ආනයනය කරන ලද නමුත් මෙතෙක් මෝටර් රථ ප්‍රවාහන දෙපාර්තමේන්තුවේ ලියාපදිංචි කර නොමැති වාහන සම්බන්ධයෙන් නීතිය ක්‍රියාත්මක කරන ආයතන විමර්ශන ආරම්භ කරන ලෙස ද නිර්දේශ කර තිබෙනවා.

ආනයනය කරන ලද නමුත් ප්‍රමාද වී ලියාපදිංචි වී ඇති හෝ බලපත්‍ර දරන්නා විසින් වෙනත් පාර්ශවයකට මාරු කරනු ලැබ ඇති වාහන සම්බන්ධයෙන් ද නීතිය ක්‍රියාත්මක විය යුතු බවත් එම නිර්දේශයන්හි ඇතුළත්.

එම විමර්ශන අවශ්‍ය වන්නේ ඒ වාහන ආනයනය කරන ලද හෝ බලපත්‍ර හිමියාට ආනයන පහසුකම් සලසන ආයතන විසින් තනි තනිව හෝ සාමූහිකව සිදු කරන ලද බලපත්‍ර අවභාවිතයක් හෝ නීති විරෝධී ක්‍රියා සිදු කර තිබේද යන්න තීරණය කිරීම සඳහායි.

විගණනයෙන් අත්හිටුවා ඇති තවත් බලපත්‍ර ලිපිගොනු 64ක් පරීක්ෂා කිරීම සඳහා ඉදිරිපත් කරන ලෙස ජාතික විගණන කාර්යාලය විසින් ඉල්ලා ඇති බව ද දෙපාර්තමේන්තුවේ අභ්‍යන්තර ආරංචි මාර්ග පවසනවා.

එම යෝජනා ක්‍රමයම අඛණ්ඩව පවත්වාගෙන යෑමට නම් බලපත්‍ර නිකුත් කිරීමේ වගකීම ආනයන අපනයන පාලක වෙත පැවරිය යුතු බව විගණකාධිපතිවරයා ඉල්ලා සිටියා.

මෙම ආනයන බලපත්‍ර නිකුත් කළ යුතු ආකාරය විස්තර කෙරෙන අදාළ කැබිනට් අනුමැතිය ලත් කමිටුවේ ප්‍රකාශයට පත් කර ඇති මාර්ගෝපදේශ උල්ලංඝනය කරමින් විද්‍යුත් වාහන ආනයනය කිරීමට අවසර දෙන චක්‍රලේඛයක් නිකුත් කිරීම සම්බන්ධයෙන් අදාළ බලධාරීන්ට එරෙහිව විනය ක්‍රියාමාර්ග ගන්නා ලෙස ද එම කාර්යාලය නිර්දේශ කරන බව ද සඳහන් වෙනවා.

එම චක්‍රලේඛයට අත්සන් කර ඇත්තේ එවක කම්කරු හා විදේශ රැකියා අමාත්‍යාංශයේ ලේකම්වරයා විසින්.

මේ සම්බන්ධයෙන් තව දුරටත් විමර්ශන සිදු කරන ලෙසත් අක්‍රමිකතා සිදුවී ඇත්නම් රජයට සිදු වූ පාඩුව අයකර ගැනීමට නීතිමය පියවර ගන්නා ලෙසත් විගණකාධිපතිවරයා විසින් ඉල්ලා තිබෙනවා.

ආනයන බලපත්‍ර යෝජනා ක්‍රමයේ පරමාර්ථය විදේශීය ශ්‍රමිකයන්ගේ ප්‍රේෂණ ඉහළ නැංවීම වන අතර මෙම අරමුණ යම් දුරකට සාක්ෂාත් කර ගෙන තිබියදීත්, විනිවිදභාවයකින් තොරව සහ අභ්‍යන්තර පාලන පද්ධති නොසළකා හැරීමේ පසුබිමක විද්‍යුත් වාහන ප්‍රතිපත්තිය අවභාවිත කර ඇති බව ජාතික විගණන කාර්යාලය නිගමනය කර තිබුණා.