වර්ජනය හේතුවෙන් දුම්රිය කිහිපයක් අවලංගු කෙරේ

දුම්රිය ස්ථානාධිපතිවරුන් ආරම්භ කර ඇති වෘත්තීය ක්‍රියාමාර්ගය හේතුවෙන් දුම්රිය ධාවනයට බාධා එල්ල වී තිබෙනවා.

වර්ජනය හේතුවෙන් සීමා සහිත දුම්රිය ධාවනය වන අතර දුම්රිය කිහිපයක් අවලංගු කර ඇති බව දුම්රිය දෙපාර්තමේන්තුව පවසයි.

කෙසේ වෙතත්, කොළඹ කොටුවේ සිට මීගමුව සහ වේයන්ගොඩ දක්වා දුම්රිය 2 බැගින් ද, පොල්ගහවෙල සිට කොටුව දක්වා දුම්රිය 2ක් ද, ගාල්ල සිට කොටුව දක්වා දුම්රිය 3ක් ද, අලුත්ගම සිට කොටුව දක්වා එක් දුම්රියක් ද ධාවනය කිරීමට පියවර ගෙන ඇති බව එම දෙපාර්තමේන්තුව පවසයි.

මේ අතර, දුම්රිය ස්ථානාධිපතිවරුන් ආරම්භ කර ඇති වෘත්තීය ක්‍රියාමාර්ගයට සහය දැක්වීමට දුම්රිය පාලකවරුන් තීරණය කර ඇති බව වාර්තා වේ.

උසස්වීම් ඇතුළු ඉල්ලීම් කිහිපයක් මුල් කර ගනිමින් ශ්‍රී ලංකා දුම්රිය ස්ථානාධිපතිවරුන්ගේ සංගමය ඊයේ (09) මධ්‍යම රාත්‍රියේ සිට වැඩවර්ජනයක් ආරම්භ කිරීමට තීරණය කර තිබුණා.

මේ හේතුවෙන් කොළඹ කොටුවට සහ බදුල්ලට සහ ඒමට යන රාත්‍රී තැපැල් දුම්රිය, ත්‍රිකුණාමලයට සහ ඒමට, මඩකලපුව බලා ඒමට සහ ඒ සඳහා ධාවනය වූ රාත්‍රී තැපැල් දුම්රිය සහ රඹුක්කන දක්වා ධාවනය වූ රාත්‍රී තැපැල් දුම්රිය ඇතුළු දුම්රිය කිහිපයක් අවලංගු කළ බව එම දෙපාර්තමේන්තුව පවසයි.

කෙසේ වෙතත්, ප්‍රවාහන අමාත්‍යාංශයේ ලේකම් රංජිත් රූබසිංහ අවධාරණය කළේ දුම්රිය ඇතුළු පොදු ප්‍රවාහනය අත්‍යාවශ්‍ය සේවා ලෙස ප්‍රකාශයට පත් කර ඇති බැවින් දුම්රිය ස්ථානාධිපතිවරුන්ගේ සංගමය ආරම්භ කර ඇති වර්ජනය නීති විරෝධී බවයි.

තවද, සේවයට වාර්තා නොකරන පුද්ගලයින්ට එරෙහිව දැඩි විනය ක්‍රියාමාර්ග ගන්නා බවද ඔහු ප්‍රකාශ කළේය.

වැඩවර්ජන තත්ත්වය හේතුවෙන් අද (10) කාර්යාලීය දුම්රිය ධාවනයට යම් බාධාවක් සිදුවුවහොත් ශ්‍රී ලංකා ගමනාගමන මණ්ඩලයේ (ශ්‍රී ලංගම) බස් රථ වැඩිපුර යෙදවීමට අවශ්‍ය පියවර ගෙන ඇති බවද රූබසිංහ මහතා ප්‍රකාශ කළේය.

දුම්රිය වාර ප්‍රවේශපත්‍ර ලබාගත් මගීන් සඳහා ලංගම බස්රථවල නොමිලේ ප්‍රවාහන පහසුකම් සලසන බව ඔහු අවධාරණය කළේය.