බුදු දහම ඇතුළු අන්‍ය ආගම්වලට අපහාසයක් සිදු කළේ යැයි සැකපිට අත්අඩංගුවට ගෙන ඇප මත මුදාහැර සිටින දේවගැති ජෙරොම් ප්‍රනාන්දුට එල්ල වී ඇති මුදල් විශුද්ධිකරණ චෝදනා සම්බන්ධයෙන් මේ වන තෙක් සිදුකර ඇති විමර්ශනවල වාර්තාවක් අධිකරණයට ඉදිරිපත් කර ඇති බව නීතිපතිවරයා ඊයේ(10) ශ්‍රේෂ්ඨාධිකරණයට දන්වා තිබෙනවා.
අදාළ ප්‍රකාශය සිදු කිරීම සම්බන්ධයෙන් දේවගැති ජෙරොම් ප්‍රනාන්දුට එරෙහිව එක්සත් ජාතීන්ගේ සිවිල් හා දේශපාලන අයිතිවාසිකම් පිළිබඳ සම්මුති පනත යටතේ නඩු පවරන ලෙස ඉල්ලා පූජ්‍ය ඇල්ලේ ගුණවංශ හිමියන් ඇතුළු සර්ව ආගමික නායකයින් ගොනු කළ මූලික අයිතිවාසිකම් පෙත්සමක් කැඳවනු ලැබූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පිරිස් මහතා මේ බව සඳහන් කළා.
මුර්දු ප්‍රනාන්දු, කුමුදුනී වික්‍රමසිංහ සහ ජනක් ද සිල්වා යන මහත්ම මහත්මීන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම කැඳවා තිබෙනවා.
පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා සඳහන් කළේ පෙත්සම්කරුවන් තිදෙනෙකු මෙම පෙත්සම ඉල්ලා අස්කර ගන්නා ලෙස තමන්ට දැනුම් දී ඇති බවයි.
ඒ අනුව පෙත්සම්කරුවන් වූ ආචාර්ය ශිවාෂ් රාමචන්ද්‍රන් කුරුක්කල් බාබු ෂර්මා, නිශාන් කුරේ පියතුමා, අල්හාජ් හසන් මොහොමඩ්, යන අය මෙම පෙත්සම ඉල්ලා අස්කර ගන්නා ලෙස තමන්ට දැනුම් දී ඇති බව ජනාධිපති නීතිඥවරයා දැනුම් දුන්නා
කෙසේ වුවද පෙත්සම් සෙසු පෙත්සම්කරුවන් එවැනි කිසිදු දැනුම්දීමක් කර නොමැති බවද ඒ මහතා සඳහන් කළා.
කරුණු සලකා බැලූ විනිසුරු මඬුල්ල මෙම පෙත්සම මීට පෙර අගවිනිසුරු ජයන්ත ජයසූරිය මහතා ප්‍රමුඛ විනිසුරු මඬුල්ලක් හමුවේත් විභාගයට ගෙන ඇති බැවින් අදාළ කරුණු අගවිනිසුරුවරයා සිටින විනිසුරු මඬුල්ලක් හමුවට ඉදිරිපත් කරන ලෙස දන්වා සිටියා .
ඒ අනුව පෙත්සම නැවත මෙම ජූලි මස 22 වැනිදා කැඳවීමට නියම කෙරුණා.
English